प्रदेश १ मा कोरोनाविरुद्धको खोपका लागि २३ वटा केन्द्र निर्धारण

6

विराटनगर – प्रदेश १ मा कोभिड-१९ विरुद्धको खोपका लागि २३ वटा केन्द्र निर्धारण गरिएको छ।

सोमबार प्रदेश १ मा ९ हजार ६०० भायल खोप आएको थियो।

१४ वटै जिल्लामा कोरोनाविरुद्धको खोपका लागि २३ वटा खोप केन्द्र निर्धारण गरिएको प्रदेश १ स्वास्थ्य निर्देशनालयका निर्देशक ज्ञानबहादुर बस्नेतले बताए।

उनका अनुसार खोप केन्द्र निर्धारण गरेर स्वास्थ्यकर्मीहरुलाई मंगलबार तालिम दिइएको छ। निर्देशानालयले पाँचथर, खोटाङ र ओखलढुंगामा बिहीबार र सोलुखुम्बु तथा संखुवासभामा शुक्रबार खोप लगाउने कार्यक्रम तय गरेको छ।

६ जिल्ला बाहेक प्रदेश १ का ८ जिल्लामा आज बुधबारबाट खोप कार्यक्रमको शुभारम्भ गरिनेछ।

मुख्यमन्त्री शेरधन राईले खोप कार्यक्रमको शुभारम्भ गर्ने बस्नेतले बताए।

झापाको मेची, दमक र बिर्तामोड अस्पताल, मोरङको कोशी अस्पताल कोभिड–१९ उपचार केन्द्र, रंगेली, विराट मेडिकल कलेज र नोबेल अस्पताल, सुनसरीको वीपी, इनरुवा, इटहरी अस्पतालमा खोप लगाउने केन्द्र निर्धारण गरिएको निर्देशक बस्नेतले बताए।

यस्तै उदयपुरमा उदयपुर अस्पताल गाईघाट, इलामको इलाम अस्पतालसहित फिक्कल र मंगलबार प्राथमिक स्वास्थ्य केन्द्र, धनकुटामा धनकुटा अस्प्ताल, तेह्रथुम अस्पताल, भोजपुर अस्पताल, पाँचथर अस्पताल, ताप्लेजुङ अस्पताल, खोटाङ अस्पताल, ओखलढुंगा अस्पताल, सोलुखुम्बु अस्पताल र संखुवासभा अस्पतालमा खोपकेन्द्र स्थापना गरिएको छ।

पहिलो चरणमा ३५ हजार ५७६ जनालाई पहिलो र दोस्रो डोज खोप लगाउने कार्यक्रम छ्। पहिलो डोज लगाएका नागरिकलाई चार हप्तापछि दोस्रो डोज लगाइने छ।

प्रदेश स्वास्थ्य आपूर्ति व्यवस्थापन केन्द्रका कोल्डचेन निरीक्षक चन्द्रकान्त ठाकुरका अनुसार प्रदेश १ का १४ जिल्ला बाहेक प्रदेश २ का सिराहा–सप्तरीका सात हजार ६८४ जनालाई खोप लगाउने कार्यक्रमका लागि सम्बन्धित खोप केन्द्रमा भ्याक्सिन पुगिसकेको छ।

Facebook Comments

https://pahilosandesh.com/wp-content/uploads/2020/05/How-To-Prevent-COVID-19_NEP1-1542x2048.jpg